கோவை, சாய்பாபா காலனி அடுத்து உள்ள கோவில்மேடு பகுதியில், தனது பிஞ்சு குழந்தைகளுடன் சாலையோரமாக நின்று கொண்டு இருந்த தந்தை மீது கட்டுப்பாட்டை இழந்த ஆட்டோ ஒன்று அசுர வேகத்தில் வந்து மோதிய நெஞ்சை உலுக்கும் விபத்தின் அதிர்ச்சியூட்டும் சி.சி.டி.வி காட்சிகள் வெளியாகிப் பொதுமக்கள் இடையே பெரும் பதற்றத்தை ஏற்படுத்தி உள்ளது.
கோவை மாநகர பகுதிகளில் சமீப காலமாக அஜாக்கிரதையான ஓட்டுதலால் ஏற்படும் விபத்துகள் அதிகரித்து வருகின்றன. இதன் ஒரு விபரீத நீட்சியாக, கோவை கோவில்மேடு பகுதியில் உள்ள பிரதான சாலையோரத்தில் தந்தை ஒருவர் தனது இரண்டு சிறு குழந்தைகளுடன் நின்று கொண்டு இருந்தார்.
அப்போது அந்த வழியாக அதிவேகமாக வந்த ஒரு பயணிகள் ஆட்டோ, ஓட்டுநரின் கட்டுப்பாட்டை இழந்து சாலையோரம் நின்று இருந்த தந்தை மீது கண் இமைக்கும் நேரத்தில் பயங்கரமாக மோதியது. ஆட்டோ மோதிய வேகத்தில் அந்த நபர் தூக்கி வீசப்பட்டார்.
அவிழ்த்துவிடப்பட்ட கைவிலங்கு.. போலீஸாருக்கு அல்வா கொடுத்த கொள்ளையன்..!
அத்துடன் நில்லாமல், அந்த ஆட்டோ அருகில் நிறுத்தப்பட்டு இருந்த மற்றொரு சரக்கு ஆட்டோ (Tata Ace / Pickup) மீதும் பலமாக மோதி நின்றது. விபத்து நடந்த அதே நொடியில்,தந்தையுடன் நின்றிருந்த இரண்டு குழந்தைகளும் நூலிழப்பில் காயமின்றி உயிர் தப்பினர்.
விபத்தைக் கண்டு அதிர்ச்சி அடைந்த அங்கு இருந்த பொதுமக்கள், உடனடியாக ஓடி வந்து காயம் அடைந்த தந்தையை மீட்டு சிகிச்சைக்காக அருகில் உள்ள மருத்துவமனைக்கு அனுப்பி வைத்தனர். இந்த ஒட்டுமொத்த கோர விபத்தின் காட்சிகள் அங்கு இருந்த ஒரு வீட்டின் கண்காணிப்பு கேமராவில் மிகத் துல்லியமாகப் பதிவாகி உள்ளது.
இந்த நெஞ்சை பதற வைக்கும் வீடியோ தற்போது சமூக வலைதளங்களில் வெளியாகிப் பார்ப்போரை அதிர்ச்சியில் உறைய வைத்து உள்ளது.
