கோவை மாவட்டம், பெரியநாயக்கன்பாளையம் அடுத்த நாயக்கன்பாளையத்தில் இருந்து கோவனூர் செல்லும் பிரதான சாலையோரக் குப்பை மேடுகளில், காடுகளின் அழகாக வலம் வர வேண்டிய மான் கூட்டம் ஒன்று பிளாஸ்டிக் கழிவுகளையும் அசுத்தங்களையும் கூட்டமாக மேய்ந்து கொண்டு இருக்கும் நெஞ்சை உலுக்கும் அவலக் காட்சி, சமூக வலைதளங்களில் வெளியாகி ஒட்டுமொத்தக் கொங்கு மண்டலத்தையும் அதிரவைத்து உள்ளது.
இந்த ஆண்டு தென்மேற்கு பருவமழை எதிர்பார்த்த அளவு பெய்யாமல் அடியோடு பொய்த்துப் போனதன் விளைவாக, மேற்குத் தொடர்ச்சி மலைப் பகுதிகளில் முன்னெப்போதும் இல்லாத அளவிற்கு மிகக் கடுமையான வறட்சியும், கோடை காலத்தை மிஞ்சும் வகையில் வெயிலின் தாக்கமும் சுட்டெரித்து வருகிறது.காடுகளுக்குள் பசுமை கருகி, சோறு கிடைக்காத அளவிற்கு உணவிற்கும், தண்ணீருக்கும் தட்டுப்பாடு ஏற்பட்டதால், தங்களின் வாழ்வாதாரத்தை இழந்து தவிக்கும் வனவிலங்குகள் கூட்டம், கூட்டமாகத் தற்பொழுது ஊருக்குள் ஊடுருவத் தொடங்கி உள்ளன.
காவல்துறை அதிகாரி மீது பாய்ந்தது வழக்கு.. லஞ்ச ஒழிப்புத்துறை நடவடிக்கை..!
இந்நிலையில், வனப்பகுதியை ஒட்டி உள்ள கோவனூர் சாலையோரக் குப்பை மேட்டில் கொட்டி வைக்கப்பட்டு உள்ள மக்காத பிளாஸ்டிக் கழிவுகள் மற்றும் வீணான உணவுப் பொருட்களை, பசி கொடுமையால் வேறு வழியின்றி மான் கூட்டம் ஒன்று ஆவலோடு தின்று பசியாறிக் கொண்டு இருந்த காட்சியை அந்த வழியாகச் சென்ற வாகன ஓட்டி ஒருவர் தனது செல்போனில் பதிவு செய்து உள்ளார்.
காட்டுயிர்கள் இந்த அளவிற்குத் தரம் தாழ்ந்து குப்பைகளை நாடும் அவல நிலை, தற்பொழுது வாட்ஸ்அப் மற்றும் சமூக வலைதளங்களில் ஹாட் டாபிக்காக வலம் வந்து சுற்றுச்சூழல் ஆர்வலர்கள் இடையே பெரும் கொந்தளிப்பை ஏற்படுத்தி உள்ளது.
பிளாஸ்டிக் கழிவுகளை உண்பதால் இந்த மான் கூட்டத்திற்கு நச்சுத்தன்மை ஏற்பட்டு அநியாயமாக உயிரிழக்கும் விபரீதம் நேரிடும் முன்பு, வனத்துறை அதிகாரிகள் உடனடியாகக் காடுகளுக்குள் செயற்கைத் தொட்டிகள் மூலம் குடிநீர் வழங்கவும், வன எல்லையோரக் குப்பைகளை அப்புறப்படுத்தவும் போர்க்கால அடிப்படையில் களமிறங்க வேண்டும் என்பதே இயற்கைக் காவலர்களின் ரெட் அலர்ட்டாக உள்ளது.
