கோவையில் பிரியாணி கடை பூட்டை உடைத்து ரூ.16 லட்சம் பொருட்கள் திருட்டு? கடை உரிமையாளர் மற்றும் வழக்கறிஞர் உள்ளிட்டோர் மீது நடவடிக்கை கோரி காவல் ஆணையரிடம் புகார்.
கோவை மாவட்டத்தில், “சிங்கை ஸ்டார் பிரியாணி” என்ற பெயரில் கடந்த ஒன்றரை ஆண்டுகளாக பாலமுருகன் என்பவர் கடை நடத்தி வருகிறார் தனது கடையின் பூட்டை உடைத்து சுமார் ரூ.16 லட்சம் மதிப்பிலான பொருட்கள் திருடப்பட்டதாக கோவை காவல் ஆணையரிடம் புகார் மனு அளித்துள்ளார்.
பக்தர்கள் வழங்கிய தங்கக் கிரீடம் மிஸ்ஸிங்.. ஐயப்பன் கோயிலில் அதிர்ச்சி சம்பவம்..!
புகார் மனுவில், கடை அமைந்துள்ள இடத்தின் உரிமையாளர் கார்த்திகேயன் என்றும், கடைக்கான முன்பணமாக ரூ.6 லட்சமும், கடையின் உள்கட்டமைப்பு பணிகளுக்காக சுமார் ரூ.16 லட்சமும் செலவு செய்துள்ளதாகவும் தெரிவித்துள்ளார்.
மேலும், மாதந்தோறும் ரூ.1 லட்சத்து 30 ஆயிரம் வாடகை முறையாக செலுத்தி வந்ததாகவும், கடையை காலி செய்யுமாறு இடத்தின் உரிமையாளர் கார்த்திகேயன் மற்றும் அவரது நண்பரான வழக்கறிஞர் லிங்கேஷ்குமார் உள்ளிட்டோர் தொடர்ந்து மிரட்டி வந்ததாகவும் புகாரில் குறிப்பிட்டுள்ளார்.
இதுதொடர்பாக கோவை மாவட்ட முதன்மை உரிமையியல் நீதிமன்றத்தில் OS 580/2026 என்ற வழக்கு நிலுவையில் உள்ளதாகவும் தெரிவித்துள்ளார். இந்நிலையில், தனது வயதான தாயாருக்கு கண் அறுவை சிகிச்சை செய்யப்பட்டதால் கடந்த ஒரு மாதமாக கடைக்கு விடுமுறை அளிக்கப்பட்டிருந்ததாகவும், இன்று காலை சுமார் 10 மணியளவில் கடையைத் திறக்கச் சென்றபோது, கடையின் பூட்டு உடைக்கப்பட்டிருந்ததாகவும் கூறியுள்ளார்.
மேலும், கடைக்குள் இருந்த சுமார் ரூ.16 லட்சம் மதிப்பிலான பொருட்களை, கார்த்திகேயன், வழக்கறிஞர் லிங்கேஷ்குமார் மற்றும் அடையாளம் தெரியாத சுமார் 15 பேர் சேர்ந்து எடுத்துச் சென்று வாகனத்தில் ஏற்றிச் சென்றதாகவும் புகாரில் தெரிவித்துள்ளார்.
எனவே, கடைக்குள் அத்துமீறி நுழைந்து பூட்டை உடைத்து பொருட்களை எடுத்துச் சென்றதாகக் கூறப்படும் நபர்கள் மீது சட்டப்படி நடவடிக்கை எடுத்து, தனது பொருட்களை மீட்டுத் தர வேண்டும் என கோவை காவல் ஆணையரிடம் புகார் மனு அளித்துள்ளார். இந்த புகாரில் தெரிவிக்கப்பட்டுள்ள குற்றச்சாட்டுகள் குறித்து காவல்துறை விசாரணை மேற்கொண்டு வருகிறது.
