மேட்டுப்பாளையம் மற்றும் அதன் சுற்று வட்டார பகுதிகளான தேக்கம்பட்டி, தாசம்பாளையம், நெல்லித்துறை, ஓடந்துறை, பாலப்பட்டி, வச்சினம்பாளையம், சிறுமுகை, லிங்காபுரம் உள்ளிட்ட பல்வேறு பகுதிகளில் கடந்த சில ஆண்டுகளாகவே “பாகுபலி” என மக்களால் செல்லமாக அழைக்கப்படும் ஒற்றை காட்டு யானையின் நடமாட்டம் இருந்து வருகிறது.
இந்த யானை பகல் வேளைகளில் அடர்ந்த வனப்பகுதிக்குள்ளும்,இரவு வேளைகளில் வனப்பகுதியை ஒட்டியுள்ள விளைநிலங்களில் முகாமிட்டு தொடர்ந்து பயிர்களை சேதம் செய்வதை வாடிக்கையாக வைத்துள்ளது. இதுவரை மனிதர்கள் எவரையும் தாக்கவோ,தாக்க முயற்சிக்கவோ இல்லை என்றாலும்,தொடர்ந்து இந்த யானை விளைநிலங்களில் முகாமிட்டு பயிர்களை சேதம் செய்வதால் விவசாயிகள் கவலையில் ஆழ்ந்துள்ளனர்.
இந்த நிலையில் கடந்த ஒரு வாரத்துக்கு முன்னர் மற்றொரு காட்டு யானையுடன் ஏற்பட்ட மோதலில் பாகுபலி யானையின் வால் பகுதியில் காயம் ஏற்பட்டுள்ளது.
இதனையறிந்த மேட்டுப்பாளையம் வனச்சரகர் சசிகுமார் தலைமையிலான வனத்துறையினர் மாவட்ட வன அலுவலர் வெங்கடேஷ் பிரபுவிற்கு தகவல் தெரிவித்துள்ளனர். இதனை தொடர்ந்து வனக்கால்நடை மருத்துவர் விஜயராகவன் தலைமையிலான குழுவினர் வால் பகுதியில் காயம்பட்ட பாகுபலி யானைக்கு சிகிச்சை மேற்கொண்டு தொடர்ந்து அதனை கண்காணித்து வருகின்றனர்.
சர்வதேச சந்தையில் கொடிகட்டிப் பறக்கும் இந்திய ஏலக்காய்.. கிடுகிடுவென உயரும் ஏற்றுமதி..!
இதனிடையே நேற்று காலை வேளையில் பாகுபலி யானை கோத்தகிரி சாலையில் உலா வந்தது.திடீரென சாலையின் குறுக்கே யானை நிற்பதை கண்ட வாகன ஓட்டிகள் சாலையின் இருபுறமும் தங்களது வாகனங்களை நிறுத்தி விட்டு யானை பாதுகாப்பாக வனப்பகுதிக்குள் செல்ல வழி ஏற்படுத்தி கொடுத்தனர்.நீண்ட நேரம் அங்கு நின்றிருந்த யானை பின் தானாக வனப்பகுதிக்குள் சென்றது.இதனால் வாகன ஓட்டிகள் அச்சமடைந்தனர்.
இதுகுறித்து மாவட்ட வன அலுவலர் வெங்கடேஷ் பிரபு கூறுகையில் “கடந்த ஒரு வாரத்திற்கு முன்னர் மற்றொரு காட்டு யானையுடன் ஏற்பட்ட மோதலில் பாகுபலி யானையின் வால் பகுதியில் காயம் ஏற்பட்டுள்ளது.இதுகுறித்து அறிந்தவுடன் வனச்சரகர் சசிகுமார் மற்றும் வனக்கால்நடை மருத்துவர் விஜயராகவன் தலைமையிலான குழுவினர் பாகுபலி யானை விரும்பி உண்ணும் களி உருண்டையில் நோய் எதிர்ப்பு மருந்துகள் மற்றும் காயத்தை குணமாக்கும் மாத்திரைகளை வைத்து யானை செல்லும் வழித்தடங்களில் வைத்தனர்.
தொடர்ந்து அந்த யானை அதனை சாப்பிட்டு சென்றுள்ளது. நேற்று முன்தினம் கூட பாகுபலி யானையின் கூடவே மேலும் இரு யானைகள் சுற்றி வந்துள்ளது. தற்போது பாகுபலி யானையின் வால் பகுதியில் ஏற்பட்ட காயம் மெதுவாக குணமடைந்து வருகிறது.எனினும்,அந்த காயம் குணமாகும் வரை வனக்கால்நடை மருத்துவர் விஜயராகவன் தலைமையிலான மருத்துவ குழுவினர் தொடர்ந்து அந்த யானையை கண்காணித்து வருகின்றனர்” என்றார்.
