தமிழ் திரையுலகில் இயக்குநர் வெற்றிமாறனின் படங்களில் நடித்துக் கவனம் பெற்றவர் நடிகர் சரண்ராஜ். கடந்த 2023ஆம் ஆண்டு ஜூன் 7ஆம் தேதி சென்னை விருகம்பாக்கம் பகுதியில் தனது இருசக்கர வாகனத்தில் சென்றுகொண்டிருந்தபோது, பின்னால் வந்த வாகனம் மோதி அவர் பரிதாபமாக உயிரிழந்தார். அப்போது காவல்துறையினர் இதனை ஒரு சாதாரண சாலை விபத்தாகவே பதிவு செய்து வழக்கை முடித்து வைத்தனர்.
ஆனால், தன் மகனின் மரணத்தில் மர்மம் இருப்பதாகக் கூறிய அவரது தாயார் மாரியம்மாள், சரண்ராஜ் சிலருக்குக் கொடுத்த பணத்தைத் திருப்பிக் கேட்டதால்தான் திட்டமிட்டுக் கொலை செய்யப்பட்டதாகக் குற்றம்சாட்டினார்.
அவன் நெப்போ கிட் இல்ல, காட்’ஸ் கிட்.. சாய் அபயங்கருக்காக குரல் கொடுத்த அட்லீ..!
இந்நிலையில், இந்த வழக்கில் தற்போது பெரும் திருப்பம் ஏற்பட்டுள்ளது. சம்பவம் நடந்த இடத்திலுள்ள சிசிடிவி காட்சிகளை ஆய்வு செய்தபோது, சரண்ராஜின் நண்பர்களுக்குத் தொடர்புடைய கார் வேண்டுமென்றே மோதியது தெரியவந்துள்ளது. மேலும், ஆரம்பகட்ட விசாரணையில் உண்மைகளை மறைத்துத் தவறான ஆவணங்களைத் தயாரித்ததாகக் கூறப்படும் ஆய்வாளர் அகிலா மீதும் குற்றச்சாட்டுகள் எழுந்துள்ளன.
தாயாரின் தொடர் சட்டப் போராட்டத்தைத் தொடர்ந்து, இந்த வழக்கை நேர்மையான அதிகாரியைக் கொண்டு விசாரணை நடத்தி 60 நாட்களுக்குள் அறிக்கை தாக்கல் செய்ய வேண்டும் எனத் தமிழ்நாடு டிஜிபிக்கு நீதிமன்றம் அதிரடி உத்தரவு பிறப்பித்துள்ளது. நடிகர் சரண்ராஜின் மரணத்திற்குப் பின்னால் உள்ள உண்மைகள் விரைவில் வெளிச்சத்திற்கு வரும் என எதிர்பார்க்கப்படுகிறது.
