கேட்டாங்க.. பதிலைக் கேட்டதும் அமைதியா இருங்க – சபாநாயகர் கண்டிப்புடன் அனல் பறந்த சட்டப்பேரவை..!

தமிழக சட்டப்பேரவையில் காவல்துறை, தீயணைப்பு மற்றும் மீட்புப் பணிகள் துறை மீதான மானியக் கோரிக்கை விவாதத்திற்குப் பதிலளித்து முதல்-அமைச்சர் விஜய் உரையாற்றிய போது அவையில் பெரும் அனல் பறந்தது.

முதல்-அமைச்சர் பேசும்போது எதிர்க்கட்சியினர் அமளியில் ஈடுபட்ட நிலையில், “முதல்-அமைச்சர் எப்போது பேசுவார் என்று கேட்டவர்கள், அவர் பதிலளிக்கும்போது அமைதியாகக் கேட்டிருக்க வேண்டும்” என சபாநாயகர் ஜே.சி.டி. பிரபாகர் சுட்டிக்காட்டினார்.

“EMI மாதிரி லஞ்சம் வாங்குனாங்க” .. சட்டசபையில் வெளுத்து வாங்கிய முதல்வர் விஜய்..!

சட்டம்-ஒழுங்கு, போதைப்பொருள் ஒழிப்புக்கான தனிப்படை நடவடிக்கைகள், ‘சிங்கப்பெண்’ சிறப்பு அதிரடிப்படை மற்றும் காவல் மரணங்களைத் தடுப்பதற்கான வெளிப்படையான நடவடிக்கைகள் குறித்த முக்கியத் தரவுகளை முதல்வர் விஜய் தனது பதிலுரையில் சமர்ப்பித்தார்.

போதைப்பொருள் ஒழிப்பு மற்றும் சிறப்பு நடவடிக்கைகள்

• வேரடி மண்ணோடு அகற்றுதல்: போதைப்பொருள் கலாசாரம் குறித்துப் பேசிய முதல்வர், “இதுவரை போதை மரத்தின் கிளைகளைத்தான் வெட்டியுள்ளோம்; அதனை வேரடி மண்ணோடு அகற்ற வேண்டும்” என்று குறிப்பிட்டதுடன், மாநிலம் முழுவதும் உள்ள 37 மாவட்டங்கள் மற்றும் 9 மாநகரங்களில் மொத்தம் 65 போதைப்பொருள் தடுப்புப் படைகள் (Anti-Narcotics Units) அமைக்கப்பட்டுள்ளதாகத் தெரிவித்தார்.
• கைது நடவடிக்கைகள் மற்றும் பறிமுதல்: போதைப்பொருள் தடுப்புச் சட்டத்தின்கீழ் இதுவரை 3,263 வழக்குகள் பதிவு செய்யப்பட்டு, 4,350 பேர் அதிரடியாகக் கைது செய்யப்பட்டுள்ளனர். இவர்களிடமிருந்து 4,846 கிலோ கஞ்சா மற்றும் 1 லட்சத்து 16 ஆயிரத்து 159 போதை மாத்திரைகள் முழுமையாகப் பறிமுதல் செய்யப்பட்டுள்ளதாக அவர் புள்ளிவிவரங்களுடன் விளக்கினார்.

‘சிங்கப்பெண்’ சிறப்பு அதிரடிப்படை

• புதிய பணியிடங்கள் மற்றும் நவீன உபகரணங்கள்: பெண்கள் மற்றும் குழந்தைகளின் பாதுகாப்பினை முதன்மையாகக் கொண்டு உருவாக்கப்பட்ட ‘சிங்கப்பெண்’ சிறப்பு அதிரடிப்படைக்காக 2,546 புதிய பணியிடங்கள் உருவாக்கப்பட்டுள்ளன.
• வாகன வசதிகள்: இப்படைக்காக 327 நான்கு சக்கர வாகனங்கள், 109 இரண்டு சக்கர வாகனங்கள் மற்றும் மொத்தம் ₹357 கோடியில் அதிநவீன தொழில்நுட்ப உபகரணங்கள் வழங்கப்பட்டு ரோந்துப் பணிகள் தீவிரப்படுத்தப்பட்டுள்ளன.
• செயல்பாட்டு வெற்றி: இந்த அதிரடிப்படையின் மூலம் இதுவரை 268 குற்ற வழக்குகள் பதிவு செய்யப்பட்டுள்ளன. மேலும், காணாமல்போன 125 பெண்கள் மற்றும் குழந்தைகள் பாதுகாப்பாக மீட்கப்பட்டு அவர்களது குடும்பத்தினருடன் சேர்க்கப்பட்டுள்ளனர். பொதுமக்கள் மத்தியில் விழிப்புணர்வை ஏற்படுத்தும் வகையில் 37,150 விழிப்புணர்வு நிகழ்ச்சிகள் நடத்தப்பட்டதோடு, 21 குழந்தை திருமணங்கள் தடுத்து நிறுத்தப்பட்டுள்ளதாகவும் முதல்வர் விஜய் தனது உரையில் பெருமையுடன் குறிப்பிட்டார்.