மத்திய கிழக்கில் ஓங்கி ஒலிக்கும் போர் முழக்கங்களுக்கு இடையே ஒரு சிறிய நிம்மதிப் பெருமூச்சாக, இஸ்ரேல் மற்றும் லெபனான் நாடுகள் 10 நாட்கள் தற்காலிக போர் நிறுத்தத்திற்கு உடன்பட்டுள்ளதாக அமெரிக்க அதிபர் டொனால்ட் ட்ரம்ப் அறிவித்துள்ளார். ஒரு மாதத்திற்கும் மேலாகத் தொடர்ந்து வரும் உக்கிரமான சண்டையைத் தொடர்ந்து, இந்த அறிவிப்பு ஒரு முக்கிய ராஜதந்திர வெற்றியாகப் பார்க்கப்படுகிறது. அதே வேளையில், ஈரானுடனான அமெரிக்காவின் நேரடி மோதலிலும் தற்போது முக்கியத் திருப்பங்கள் ஏற்பட்டுள்ளன.
இஸ்ரேல் – லெபனான் போர் நிறுத்த விவரங்கள்:
வாஷிங்டன் நேரப்படி வியாழக்கிழமை மாலை 5 மணி முதல் (இந்திய நேரப்படி வெள்ளிக்கிழமை அதிகாலை) இந்தத் தற்காலிக போர் நிறுத்தம் அமலுக்கு வந்துள்ளது.
ட்ரம்ப் அறிவிப்பு: தனது ‘ட்ரூத் சோஷியல்’ தளத்தில் இந்த அறிவிப்பை வெளியிட்ட ட்ரம்ப், “இந்த இரு தலைவர்களும் (நெதன்யாகு மற்றும் ஆவுன்), தங்கள் நாடுகளுக்கு இடையே அமைதியை ஏற்படுத்துவதற்காக, 10 நாள் போர் நிறுத்தத்தை முறைப்படி தொடங்க ஒப்புதல் அளித்துள்ளனர்” என்று குறிப்பிட்டுள்ளார்.
இந்த வாரத் தொடக்கத்தில் அமெரிக்க வெளியுறவுத்துறைச் செயலாளர் மார்கோ ரூபியோ ஏற்பாடு செய்திருந்த ஒரு ராஜதந்திரக் கூட்டத்தில், இரு நாடுகளும் 34 ஆண்டுகளில் முதன்முறையாக நேரடியாகப் பேச்சுவார்த்தை நடத்தின. அதன் தொடர்ச்சியாகவே இந்த ஒப்பந்தம் எட்டப்பட்டுள்ளது.
ஹிஸ்புல்லா மீதான ட்ரம்பின் பார்வை மற்றும் சவால்கள்:
இந்த போர் நிறுத்தம் வரவேற்கத்தக்கது என்றாலும், கள நிலவரம் இன்னும் உடையக்கூடிய நிலையிலேயே உள்ளது.
“நல்லபடியாக நடப்பார்கள்“: போர் நிறுத்த அறிவிப்பை வெளியிட்ட அதே ட்ரூத் சோஷியல் பதிவில், ட்ரம்ப் அதிரடியாக “ஹிஸ்புல்லா நல்லபடியாக நடந்துகொள்ளும் என்று நம்புகிறேன்“ என்றும் குறிப்பிட்டுள்ளதாக ‘ஃபாக்ஸ் நியூஸ்’ செய்தி வெளியிட்டுள்ளது.
ராணுவ நிலைப்பாடு: போர் நிறுத்தம் அமலில் இருக்கும்போதும், தெற்கு லெபனானில் ஏற்கனவே தான் ஆக்கிரமித்துள்ள பகுதிகளில் இஸ்ரேலிய ராணுவம் தனது நிலைகளைத் தொடர்ந்து தக்கவைத்துக் கொள்ளும் என இஸ்ரேலிய பாதுகாப்பு அதிகாரி ஒருவர் தெரிவித்துள்ளார்.
ஹிஸ்புல்லா ரியாக்ஷன்: போர் நிறுத்தம் என்பது இஸ்ரேலியப் படைகள் லெபனானுக்குள் தாராளமாக நடமாட அனுமதிப்பதாக இருக்கக்கூடாது என ஹிஸ்புல்லாவுக்கு நெருக்கமான வட்டாரங்கள் கூறியுள்ளன. லெபனான் மண்ணில் இஸ்ரேலிய ராணுவம் இருப்பது தங்களுக்கு “எதிர்க்கும் உரிமையை” வழங்குகிறது என்றும் அவர்கள் சுட்டிக்காட்டியுள்ளனர்.
அமெரிக்கா – ஈரான்: “கொள்கை அளவிலான ஒப்பந்தம்“
இஸ்ரேல் – லெபனான் விவகாரம் ஒருபுறம் இருக்க, அமெரிக்கா – ஈரான் இடையே நிலவி வரும் போர் பதற்றத்திலும் நேர்மறையான மாற்றங்கள் தெரியத் தொடங்கியுள்ளன.
13 கப்பல்கள் திருப்பியனுப்பப்பட்டன: அமெரிக்கப் படைகள் ஈரானிய துறைமுகங்களைக் குறிவைத்துக் கடற்படை முற்றுகையை அறிவித்ததில் இருந்து, திங்கட்கிழமை முதல் இதுவரை 13 வர்த்தக மற்றும் சரக்குக் கப்பல்களை அமெரிக்க கடற்படை திருப்பி அனுப்பியுள்ளதாக ‘என்பிசி நியூஸ்’ தெரிவித்துள்ளது.
அமைதி ஒப்பந்தம்: இத்தகைய கடுமையான பொருளாதார மற்றும் ராணுவ அழுத்தங்களுக்கு மத்தியில், அமெரிக்கா மற்றும் ஈரான் இடையே “கொள்கை அளவில் ஒப்பந்தம்” ஏற்பட்டுள்ளதாகப் பிராந்திய அதிகாரிகள் தெரிவித்துள்ளனர்.
அடுத்த சுற்றுப் பேச்சுவார்த்தை: இந்த ஒப்பந்தத்தை முழுமையாக இறுதி செய்வதற்காக, அடுத்த சுற்று நேரடிப் பேச்சுவார்த்தைகள் பாகிஸ்தானில் நடைபெறவுள்ளன.
