அசாம் மாநிலத்தில் இருந்து திருவண்ணாமலை அருணாச்சலேஸ்வரர் கோயிலுக்காக 8 வயதுடைய ஆண் குட்டி யானை ஒன்று சமீபத்தில் கொண்டுவரப்பட்டது. எட்டு ஆண்டுகளுக்கு முன்பு ‘ருக்கு’ என்ற கோவில் யானை உயிரிழந்த நிலையில், தற்போது புதிய யானை கோயிலுக்கு வந்துள்ளது. இது ஒருபுறம் ஆன்மீக பக்தர்களிடையே மகிழ்ச்சியை ஏற்படுத்தியிருந்தாலும், மறுபுறம் வனவிலங்குகளைக் கோயில்களில் வளர்ப்பது குறித்த விவாதங்களையும் கிளப்பியுள்ளது. அந்த வகையில், பிரபல நடிகை சந்தியா இதுகுறித்து வெளியிட்டுள்ள விடியோ சமூக வலைதளங்களில் தீயாகப் பரவி வருகிறது.
“ஃபகத் பாசிலை பார்த்து வியந்த சூர்யா!” – சினிமா மேடையில் நெகிழ்ச்சிப் பேச்சு..!
“கோவிலுக்கு எதுக்கு யானை? பக்தி என்ற பெயரால் இன்னும் என்னென்ன செய்யப் போறீங்க?” என அவர் கேள்வி எழுப்பியதைத் தொடர்ந்து, நெட்டிசன்கள் பலரும் அவரைத் கடுமையாக விமர்சித்து வந்தனர். இதற்கு மசியாத நடிகை சந்தியா, அண்மையில் வெளியிட்டுள்ள மறுபதில் வீடியோவில் தன் மீதான தனிப்பட்ட தாக்குதல்களுக்கும் விமர்சனங்களுக்கும் காட்டமாகப் பதிலடி கொடுத்துள்ளார்.
“ட்ரெண்டாக வேண்டும் என்பதற்காக நான் பேசவில்லை; காட்டுல இருக்க வேண்டிய யானையைக் கொண்டு வந்து சங்கிலியால் கட்டிப் பணம் வசூலிப்பது சரியா?” என்று கேள்வி எழுப்பிய அவர், விலங்குகளின் உரிமைக்காகக் குரல் கொடுப்பவர்களைப் பாடி ஷேமிங் செய்வதும், கடவுள் படங்களை டிபி-யாக வைத்துக்கொண்டு அசிங்கமாகக் கமெண்ட் செய்வதையும் வன்மையாகக் கண்டித்துள்ளார்.
தான் ஒரு தெலுங்குப் பெண் என்பதால் கருத்துச் சொல்லக் கூடாது என்பதில் எந்த நியாயமும் இல்லை என்றும், ஆன்மீகத்தின் பெயரால் விலங்குகள் படும் அவஸ்தைகளைப் பற்றிச் சிந்திக்க வேண்டும் என்றும் அவர் அந்த வீடியோவில் வாதாடியுள்ளது தற்போது இணையத்தில் பெரும் விவாதத்தை ஏற்படுத்தியுள்ளது.
