சட்டப்பேரவையில் முதல்வர் விஜய் மிசா மற்றும் அமலாக்கத்துறை வழக்குகள் குறித்துப் பேசியது விதிமீறல் என்றும், எதிர்க்கட்சித் தலைவர் மு.க.ஸ்டாலினின் தியாகத்தை அவர் கொச்சைப்படுத்திப் பேசியுள்ளதாகவும் திமுக மூத்த தலைவர் எ.வ.வேலு குற்றம்சாட்டியுள்ளார்.
முதல்வர் பேசியதை அவைக்குறிப்பில் இருந்து நீக்கக் கோரிய திமுகவினரின் கோரிக்கையை சபாநாயகர் மறுத்துவிட்டதாகவும், சபாநாயகர் ஒருதலைப்பட்சமாகச் செயல்பட்டதால் திமுகவினர் குண்டுக்கட்டாக வெளியேற்றப்பட்டதாகவும் அவர் செய்தியாளர்களிடம் தெரிவித்தார். தாங்கள் நடத்தியது மக்கள் நலனுக்கான “ரியல் ஆட்சி” என்றும், தற்போது நடப்பது வெறும் “ரீல்ஸ் ஆட்சி” என்றும் அவர் கடுமையாக விமர்சித்துள்ளார்.
கிடுகிடுவென உயர்ந்த கட்டணம்.. பண்டிகை காலத்தைக் குறிவைத்து பல மடங்கு வசூல்..!
முன்னதாக, நீதிமன்றத்தில் விசாரணையில் உள்ள வழக்குகள் குறித்தும், அமலாக்கத்துறை அறிக்கைகள் குறித்தும் சட்டமன்ற விதிமுறைகளுக்கு முரணாக முதல்வர் விஜய் பேசியதாக எ.வ.வேலு சுட்டிக்காட்டினார். குறிப்பாக, கடந்த கால மிசா காலக்கட்டத்தில் எதிர்க்கட்சித் தலைவர் மு.க.ஸ்டாலின் அனுபவித்த சிறைவாசத்தையும் அவரது தியாகத்தையும் முதல்வர் கிண்டல் செய்யும் வகையில் உடல்மொழியைப் (Body Language) பயன்படுத்திப் பேசியது ஏற்புடையதல்ல என்றார்.
முதல்வர் பேசிய கருத்துக்களை அவைக்குறிப்பில் இருந்து நீக்க வேண்டும் என்று கோரி திமுக உறுப்பினர்கள் வலியுறுத்தியபோது, சபாநாயகர் அதனை ஏற்க மறுத்துவிட்டார். இதனைக் கண்டித்து அமளியில் ஈடுபட்ட திமுக உறுப்பினர்கள் சபாநாயகரின் உத்தரவின்பேரில் அவைக்காவலர்களால் குண்டுக்கட்டாக வெளியேற்றப்பட்டனர். சபாநாயகர் நடுநிலையாகச் செயல்படாமல் ஒருதலைப்பட்சமாக நடந்துகொண்டதாகக் குற்றம்சாட்டிய எ.வ.வேலு, தமிழ்நாட்டில் தற்போது நடப்பது மக்கள் நலனுக்கான உண்மையான ஆட்சி அல்ல, மாறாக விளம்பரத்துக்காக நடக்கும் ஒரு “ரீல்ஸ் ஆட்சி” எனத் கடுமையாக விமர்சித்தார்.
