தமிழ் திரையுலகில் எதிர்பார்ப்பை கிளப்பியுள்ள புதிய படங்களில் ஒன்றாக உருவெடுத்து வரும் “அரசன்” குறித்து புதிய தகவல்கள் வெளியாகி ரசிகர்களின் கவனத்தை ஈர்த்துள்ளன.
நடிகர் சிலம்பரசன், சமீபத்தில் கமல் ஹாசன் நடித்த “தக் லைப்” திரைப்படத்தில் தனது தோற்றத்தால் பேசப்பட்ட நிலையில், தற்போது இயக்குநர் வெற்றி மாறன் இயக்கத்தில் உருவாகும் “அரசன்” திரைப்படத்தில் தீவிரமாக ஈடுபட்டு வருகிறார்.
இந்த படத்தில் விஜய் சேதுபதி, சமுத்திரக்கனி, கிஷோர், ஆண்ட்ரியா ஜெரேமியா மற்றும் இயக்குநர் நெல்சன் திலீப்குமார் உள்ளிட்ட பலர் முக்கிய கதாபாத்திரங்களில் நடித்து வருவது படத்தின் மீது எதிர்பார்ப்பை அதிகரித்துள்ளது.
வடசென்னையின் பின்னணியை மையமாகக் கொண்டு உருவாகி வரும் இந்த படம், வடசென்னை படத்தின் காலக்கட்டத்தோடு தொடர்புடைய கதையம்சத்தை கொண்டதாக கூறப்படுகிறது. இதனால், “அரசன்” திரைப்படம் ஒரு வகையில் அந்த உலகத்தை விரிவுபடுத்தும் முயற்சியாக இருக்குமா என்ற கேள்வியும் ரசிகர்களிடையே எழுந்துள்ளது.
தற்போது இப்படத்தின் இரண்டாம் கட்ட படப்பிடிப்பு சென்னை நகரில் வேகமாக நடைபெற்று வருகிறது. படப்பிடிப்பு தளத்தில் வெற்றி மாறன் மற்றும் சிலம்பரசன் இணைந்து பணியாற்றும் புகைப்படங்கள் சமீபத்தில் சமூக வலைதளங்களில் வெளியாகி வைரலானது. இது படத்தின் மீதான ஆர்வத்தை மேலும் தூண்டியுள்ளது.
இதேவேளை, நடிகை பிரியங்கா மோகன் இப்படத்தில் முக்கிய கதாபாத்திரத்தில் நடிக்க உள்ளதாக தகவல்கள் வெளியாகியுள்ளன. மேலும் “டூரிஸ்ட் பேமிலி” படத்தின் மூலம் கவனம் பெற்ற யோக லட்சுமியும் இப்படத்தில் குறிப்பிடத்தக்க கதாபாத்திரத்தில் நடித்து வருகிறார் என்பது குறிப்பிடத்தக்கது.
தொழில்நுட்ப ரீதியாகவும் படக்குழு வலுவாக அமைந்துள்ளது. அனிருத் ரவிச்சந்தர் இசையமைக்கும் இப்படத்திற்கு, ஒளிப்பதிவை வேல்ராஜ் கவனித்து வருகிறார்.
அடுத்தடுத்து படப்பிடிப்பு வேகமாக நடைபெற்று வரும் நிலையில், “அரசன்” திரைப்படம் இந்த ஆண்டு இறுதிக்குள் திரைக்கு வரும் என கூறப்படுவது, ரசிகர்களிடையே பெரும் எதிர்பார்ப்பை ஏற்படுத்தியுள்ளது.
